Ադրբեջանը իր վարկանիշը բարձրացնելու հույսով նոր PR ակցիա է սկսել, որով, ըստ էության» ԼՂՀ հայերին առաջարկում է վաճառվել: Խոսքը Լեռնային Ղարաբաղում բնակվող հայ քաղաքացիների՝ ԽՍՀՄ-ի բանկերում ունեցած ավանդները վերադարձնելու հնարավորության մասին է, բայց պայմանով, որ նրանք դիմեն... Ադրբեջանի քաղաքացիություն ստանալու համար:

«Ադրբեջանի հանրապետության ազգությամբ հայ քաղաքացիները, ովքեր ապրում են մեր երկրի օկուպացված տարածքներում, նույնպես իրավունք ունեն փաստաթղթեր ներկայացնել խորհրդային ավանդներն ստանալու համար: Դրա համար նրանք պետք է հաստատեն իրենց քաղաքացիությունը այլ երկրների նոտարական գրասենյակների կամ մեր երկրի համապատասխան ատյանների միջոցով: Նրանք կարող են փոխհատուցում ստանալ կամ մեր երկրի բանկերում, կամ համապատասխան փոխանցում կարվի օտարերկրյա բանկերին»,- հայտարարել է Ադրբեջանի խորհրդարանի պատգամավոր Այդըն Միրզազադեն:

Իր հերթին, «Աջակցություն հասարակության հետ կապերի զարգացմանը» ՀԿ-ի նախագահ, «Azer-Globe» հասարակական-քաղաքական հետազոտությունների ինստիտուտի Կովկասի պատմության կենտրոնի տնօրեն Շելալե Հասանովան հայտարարել է, որ PR-ը օգտակար կլինի ճիշտ կազմակերպված մեդիա-մարտավարության եւ մեդիա-ռազմավարության դեպքում:

«Եթե մեր երկիրը տեխնոլոգիապես ճիշտ կարողանա ներկայացնել տեղեկությունը, որ Ադրբեջանը կապահովի խորհրդային ավանդների վերդարձն այն հայերին, ովքեր կհաստատեն Ադրբեջանի իրենց քաղաքացիությունը, դա մեր օգտին կլինի: Հերթական անգամ աշխարհը կտեսնի մեր ժողովրդի հանդուրժողականությունը եւ կհերքվի հայկական սուտը, թե մեր երկրում իրենց վատ են վերաբերվել: Սակայն դա պետք է այնպես անել, որպեսզի այդ տեղեկատվությունն անմիջապես հասնի հասցեատիրոջը եւ Արեւմուտքի այն անձանց, ովքեր որոշակի քաղաքական որոշումներ են կայացնում»,-ասել է նա:

Նկատենք, սակայն, որ ոչ մի նմանատիպ PR չի կարող մոռացնել տալ այն վնասը, որն Ադրբեջանը կրեց մարդասպանին ներում շնորհելով եւ հերոսացնելով, չխոսելով արդեն այն մասին, որ ոչ մի հայ չի «վաճառվի» նման նախաձեռնությանը:

Չիշտ կլիներ, որ ադրբեջանցի PR գործիչներն Արեւմուտքին հիշեցնեին նաեւ հայկական կոտորածների, սպանությունների ու հարյուր հազարավոր հայ փախստականների մասին: