Հայոց ցեղասպանության բանաձեւի հեղինակներ Ռոբերթ Դոլդը եւ Ադամ Շիֆը Կոնգրեսի իրենց գործընկերներին կոչ են արել ստորագրել այն նամակի ներքո, որում պետքարտուղար Հիլարի Քլինթոնին կոչ է արվում հրաժարվել Հայերի ցեղասպանության մասին վերջերս արված իր հայտարարություններից:
Կոնգրեսականները նամակում Հիլարի Քլինթոնին կոչ են անում հրաժարվել Հայոց ցեղասպանության որպես «պատմական վեճի» բնորոշումից, հայտնում է Ամերիկայի հայ դատի գրասենյակը (ANCA):
Կոնգրեսականները նշում են, որ 1915 թվականի իրադարձության որպես «պատմական վեճի» բնորոշումը նախաձեռնված է Թուրքիայի եւ բոլոր նրանց կողմից, ովքեր ժխտում են ցեղասպանությունները:
Պետքարտուղար Քլինթոնին ուղղված նամակում նշվում է, որ նրա «Հայոց ցեղասպանության ոչ ճիշտ պատմական բնորոշումը, ինչպես նաեւ Ամերիկայի հայերի եւ ցեղասպանության մյուս սերունդների զգացմունքները վիրավորելը թուրքական հանրապետության եւ նրա` ցեղասպանության ժխտման ամոթալի քաղաքականության արտահայտությունն է հանդիսանում»:
| 
