Ամերիկյան երգչուհի Ուիթնի Հյուսթոնի դիահերձման ժամանակ նրա թոքերում ջուր է հայտնաբերվել: Այս փաստը վկայում է այն բանի օգտին, որ երգչուհին խեղդվել է ջրով լի լոգարանում քնած ժամանակ կամ գիտակցությունը կորցնելու հետեւանքով:
Մահվանից հետո ջուրն ընկղմված մարդու թոքերը ջուր չի լցվում: Այս մասին հայտնում է TMZ համացանցային կայքը` հղում անելով Բեւերլի Հիլզի ոստիկանությունում իր աղբյուրներին:
Դիահերձում կատարող բժիշկները պարզել են երգչուհու թոքերում գտնվող ջրի ծավալը: Տվյալ ցուցանիշը կարող է որոշիչ դառնալ մահվան իսկական պատճառը հայտնաբերելու ընթացքում:
Այդ նույն ժամանակ հետաքննիչները դեռեւս վերջնական եզրահանգում չեն անում` արդյոք Հյուսթոնը ջուրն ընկղմվելուց առաջ թե հետո է մահացել, հայտնում է հրատարակչությունը:
Ինչպես ավելի վաղ հայտնել էր NEWS.am-ը, Ուիթնի Հյուսթոնը փետրվարի 12-ի գիշերը հայտնաբերվել էր մահացած Բեւերլի Հիլսի հյուրանոցներից մեկի չորրորդ հարկի համարում, ուր երգչուհին եկել էր Grammy երաժշտական մրցանակաբաշխությանը մասնակցելու համար:
Ըստ The Los Angeles Times թերթի տվյալների` մահվան նախօրեին Հյուսթոնը մասնակցել է համերգի փորձին, որը պետք է տեղի ունենար Grammy-ի պատվին ընդունելության ժամանակ, սակայն արդեն այդ ժամանակ էլ, ըստ ականատեսների վկայությունների,երգչուհին իրեն տարօրինակ է պահել, եւ փորձը նրան հեշտությամբ չի տրվել:
Այնուհետեւ նա վերադարձել է Beverly Hilton հյուրանոցի իր համարը, որտեղից էլ 3.43-ին շտապօգնություն եւ ոստիկանություն կանչ է արձանագրվել: Դեպքի վայր ժամանելով` բժիշկները փորձել են Հյուսթոնին օգնություն ցուցաբերել, արհեստական շնչառություն են կատարել, սակայն 3.55-ին ստիպված են եղել արձանագրել երգչուհու մահը:
|