«Հնարավոր է, Նիկոլա Սարկոզին նախագահի ընտրությունների գնա այդպես էլ օրենքը չստորագրած»։ Այս մասին այսօր «Ա1+»-ին ասաց ՀՅԴ Հայ Դատի եւ քաղաքական հարցերի գրասենյակի պատասխանատու Կիրո Մանոյանը։
Նա հաստատեց տեղեկությունը, որ Ֆրանսիայի Սենատի 72 անդամներին հաջողվել է հավաքել անհրաժեշտ 72 ստորագրությունը եւ մտնել Սահմանադրական խորհուրդ։
Ըստ պարոն Մանոյանի, Սահմանադրական խորհուրդը մեկ ամիս ժամանակ ունի քննարկելու եւ եզրակացության գալու։ «Եթե Խորհուրդը եզրակացնի, որ «Ցեղասպանության ժխտումը քրեականացնող օրինագիծը» հակասահմանադրական է, այն կվերադարձվի Ազգային ժողով, որպեսզի վերջինս քննարկի եւ վերացնի օրինագծի հակասահամանդրական էլեմենտները»,-պարզաբանեց պարոն Մանոյանը։
Սակայն ըստ նրա, մեկ ամսից Ազգային Ժողովը կմեկնի արձակուրդ, որպեսզի նախապատրաստվի նախագահի ընտրություններին։
«Կարող է եւ չմեկնի եւ հրատապության կարգով քննարկի էլեմենտները»,-ասաց պարոն Մանոյանը։ Մյուս տարբերակն, ըստ նրա, այն է, որ կքննարկեն վերադարձից հետո։
Կիրո Մանոյանը ներկայացրեց իրադարձությունների զարգացման երեք սցենար՝ առաջին՝ Սահմանադրական Խորհուրդը կարող է վճռել, որ օրինագիծը չի հակասում Սահմանադրությանը, երկրորդ՝ կարող է վճռել, որ օրինագծի որոշ դրույթներ են հակասում Սահամանադրությանը։
«Այդ դեպքում է, որ ԱԺ-ն վերստին հավաքվելու պատճառ կունենա»,-ասաց Կիրո Մանոյանը։ Երրորդ տարբերակն, ըստ նրա, ամենաանցանկալին է՝ ՍԽ-ն որոշում է, որ օրենքն ամբողջությամբ հակասահմանադրական է։
«Եթե մերժի ամբողջ օրենքը, գործընթացը զրոյից է սկսվելու»,-պարզապանեց ՀՅԴ Հայ Դատի եւ քաղաքական հարցերի գրասենյակի պատասխանատուն։ Նա նաեւ տեղեկացրեց, որ փաստորեն այսօրվանից սկսած մեկ ամսվա ընթացքում նախագահ Նիկոլա Սարկոզին չի կարող ստորագրել օրենքը, քանի դեռ Սահմանադրական խորհուրդը որոշում չի կայացրել։ Ի դեպ, պարոն Մանոյանը տեղեկացրեց, որ օրինագիծը հակասահմանադրական ճանաչող 72 պատգամավորներից 62-ը Սենատի ծայրահեղ ձախ անդամներն են՝ համայնավարներ, մարքսիստներ եւ նախկին կանաչներ։ Մնացածը իշխող կուսակցությունից են եւ սոցիալիստներ։
|